ვირტუალურ რეალობაში ობიექტებთან შეხება უკვე შესაძლებელია

კომპანია HaptX-მა ინოვაციური ტაქტილური ხელთათმანები, Gloves G1 წარმოადგინა. მწარმოებლის თქმით, სიახლე ადამიანს საშუალებას მისცემს ფიზიკურ დონეზე შეიგრძნოს ვირტუალურ რეალობაში არსებულ ობიექტთან შეხება.

HaptX Gloves G1-ის ფასი საკმაოდ მაღალია, თუმცა ეს აიხსნება მათ შორის იმითაც, რომ მოწყობილობის სამიზნე აუდიტორიას კორპორატიული სეგმენტი წარმოადგენს. კომპლექტაციაში, ყურსასმენებთან ერთად მყიდველი, ზურგჩანთის მსგავს ბლოკს — Airpack-ს მიიღებს. ბლოკის დანიშნულებაა უზრუნველყოს კავშირი ვირტუალურ რეალობასთან და ხელით, რომელიმე ციფრულ ობიექტთან შეხებისას, ჰაერის შეკუმშვის გამოყენებით, შეხების რეალისტური აღქმა შექმნას.

HaptX Gloves G1-ის ღირებულება $5495-ს შეადგენს, თუმცა ეს საბოლოო ხარჯი როდია. დამატებით, საჭირო იქნება ყოველთვიური გამოწერის გაფორმება, რომელიც თვეში $495 დაგიჯდებათ. აღნიშნული ხარჯი ითვალისწინებს სამომავლო ტექნიკურ მომსახურებას და HaptX SDK-სთან წვდომას.